Droichead

Droichead, céard é féin?

Creat comhtháite ionduchtúcháin is ea Droichead, do mhúinteoirí nua-cháilithe (MNC - NQT). Agus dearadh é as tuiscint ar thábhacht na tréimhse ionduchtúcháin san aistear foghlama feadh an tsaoil a dhéanann múinteoir. Aithníonn sé go bhfuiltear ag fáiltiú go foirmiúil roimh mhúinteoir nua go dtí gairm na múinteoireachta tar éis dó/di an ghné tosaigh in oiliúint múinteora a chur i gcrích.

Baineann gníomhaíochtaí scoilbhunaithe agus gníomhaíochtaí breise san fhoghlaim ghairmiúil araon le Droichead chun freastal ar riachtanais múinteoirí agus iad ag tosú ina ngairm. Cuirtear Droichead ar fáil i mbunscoileanna, in iar-bhunscoileanna, i scoileanna speisialta agus in Ionaid Oideachais ina bhfuil ábhar curaclaim iar-bhunscoile amháin nó níos mó á m(h)úineadh, ach na scoileanna/ na hIonaid sin a bheith cláraithe leis an gClár Náisiúnta Ionduchtaithe do Mhúinteoirí (CNIM - NIPT) mar rannpháirtithe sa phróiseas Droichead.

Céard é príomhchuspóir an phróisis Droichead?

Is é príomhchuspóir an phróisis Droichead, tacú le foghlaim ghairmiúil na múinteoirí nua-cháilithe le linn tréimhse an ionduchtúcháin, agus sa tslí sin bunsraith a leagan síos don fhorbairt ghairmiúil amach rompu agus don fhoghlaim sa chéad tréimhse eile dá ngairm.

Cé na poist mhúinteoireachta i mbunscoil a aithnítear chun críche an próiseas Droichead a dhéanamh?

Tabharfaidh múinteoir bunscoile faoin bpróiseas Droicheadsa ghnáthshlí agus é/í fostaithe mar mhúinteoir ranga príomhshrutha i mbunscoil aitheanta.  Bíonn fostaíocht íoctha incháilithe de ghnáth, is cuma an fostaíocht bhuan, fostaíocht shealadach nó fostaíocht ionaid í, a fhad is go bhfuil 11 ábhar déag an Churaclaim Bunscoile, Gaeilge san áireamh, á múineadh ag an múinteoir do rang príomhshrutha (aonghráid nó ilghráid), an lá scoile ar fad.

Ba cheart do scoileanna múinteoirí nua-cháilithe a chur i mbun ranganna príomhshrutha, seachas i gcásanna eisceachtúla. I gcásanna áirithe, más é an múinteoir nua-cháilithe an múinteoir is oiriúnaí chun tacaíocht a thabhairt do riachtanais daltaí, d’fhéadfadh múinteoir an próiseas Droichead a chur i gcrích i gceann de na róil seo a leanas:

a) mar mhúinteoir ranga speisialta i scoil phríomhshrutha

b) mar mhúinteoir i scoil speisialta

c) mar mhúinteoir acmhainne lánaimseartha do dhaltaí faoi mhíchumas íseal-leibhéil (de réir mar a shainítear sa Roinn Oideachais agus Scileanna)

d) mar mhúinteoir tacaíochta foghlama lánaimseartha

e) i ról ina bhfuil c) agus d) thuas (post tacaíochta foghlama/ múinteoir acmhainne).

 Sna cásanna thuas, caithfidh an cohórt céanna daltaí a bheith á múineadh i gcaitheamh thréimhse na fostaíochta (seachas i gcás asláithreachtaí eisceachtúla).  Ba cheart do scoil, mar chuid den phróiseas Droichead, a chinntiú go mbeidh deiseanna ag múinteoir nua-cháilithe múineadh i gcomhthéacs príomhshrutha, agus múineadh agus foghlaim na Gaeilge i rang príomhshrutha ina chuid de, i gcomhar leis an múinteoir ranga.

Cé na poist mhúinteoireachta in iar-bhunscoil a aithnítear chun críche an próiseas Droichead a dhéanamh?

Tabharfaidh múinteoir iar-bhunscoile faoin bpróiseas Droichead sa ghnáthshlí agus é/i fostaithe i scoil aitheanta agus ag múineadh ábha(i)r curaclaim iar-bhunscoile do rang ainmnithe ar amchlár na scoile.

D’fhéadfadh múinteoir an próiseas Droichead a dhéanamh freisin agus é/í fostaithe i gceann de na róil seo a leanas:

a)       mar mhúinteoir iar-bhunscoile i scoil phríomhshrutha agus é/í fostaithe i bpost tacaíochta foghlama, i bpost riachtanais speisialta nó i post tacaíochta teanga

b)      i scoil speisialta ina bhfuil céatadán de na daltaí atá ag freastal ar an scoil in aois iar-bhunscoile, agus ina bhfuil an múinteoir ag múineadh ábha(i)r curaclaim iar-bhunscoile do na daltaí sin, nó

c)      in Ionad Oideachais ina bhfuil ábha(i)r curaclaim iar-bhunscoile á m(h)úineadh.

Nuashonraíodh téarmaíocht i gcás comhthéacsanna Riachtanais Speisialta Oideachais, agus is ról an Mhúinteora Oideachais Speisialta a bhíonn i gceist anois, de réir Chiorclán 14/2017. An féidir Droichead a dhéanamh nuair atá múinteoir fostaithe i ról dá leithéid?

Is féidir. Tá múinteoirí atá fostaithe mar Mhúinteoir Oideachais Speisialta incháilithe chun cur isteach ar Droichead.

An bhféadfadh Múinteoir Nua-cháilithe iarratas le haghaidh Droichead a chur isteach má tá sé/sí fostaithe i ról múinteoireachta Oideachais Speisialta lánaimseartha atá roinnte?

D’fhéadfadh múinteoir nua-cháilithe iarratas Droichead a chur isteach má tá sé/sí:

 

(1) fostaithe i scoil* amháin Droichead ar a laghad agus 

(2) ag fáil tacaíochta ón bhFoireann Tacaíochta Gairmiúla (FTG - PST) chéanna i gcaitheamh an phróisis**.

 

*Scoileanna Droichead ar fad a bheadh i gceist, go hidéalach.

 

**Ba cheart dul i dteagmháil leis an gClár Náisiúnta Ionduchtaithe do Mhúinteoirí (CNIM - NIPT) agus a chinntiú gur féidir an próiseas a chur i gcrích má tá an fhostaíocht roinnte idir scoileanna. 

An bhféadfadh múinteoir nua-cháilithe cur isteach ar Droichead má tá sé/sí fostaithe i gcomhthéacs réamhscoile i scoil phríomhshrutha, Tús Luath san áireamh?

Ní fhéadfadh, ní post incháilithe é sin chun Droichead a dhéanamh.

An bhféadfadh múinteoir nua-cháilithe atá fostaithe ar bhonn postroinnte cur isteach ar Droichead?

Ní bheidh an cleachtadh iarcháiliúcháin a theastaíonn, an riachtanas 60 lá as a chéile, ag múinteoir bunscoile atá fostaithe ar bhonn postroinnte, agus ar an ábhar sin ní fhéadfadh sé/sí a bheith rannpháirteach sa phróiseas Droichead.  D’fhéadfadh múinteoir iar-bhunscoile atá fostaithe ar bhonn postroinnte a bheith i dteideal cur isteach ar Droichead, a fhad is go bhfuil sé/sí ag obair i gcomhthéacs incháilithe.

An bhféadfaí an próiseas Droichead a dhéanamh i scoil a  mhaoinítear go príobháideach?

D’fhéadfaí. Is féidir an próiseas Droichead a chur i gcrích i scoil phríobháideach atá ina ball den Aontas Scoileanna Sóisearacha Neamhspleácha (Association of Independent Schools - AJIS), má thoilíonn bainistíocht na scoile leis an bpróiseas agus má tá fáil ar mhúinteoirí cláraithe don Fhoireann Tacaíochta Gairmiúla (FTG - PST).

An bhféadfadh Múinteoir Nua-cháilithe cur isteach ar Droichead má tá sé/sí fostaithe mar mhúinteoir a mhúineann Béarla mar Theanga Bhreise (BTB - EAL)?

D’fhéadfadh múinteoir cur isteach ar Droichead má tá sé/sí fostaithe mar mhúinteoir Béarla mar Theanga Bhreise (BTB - EAL), i gcomhthéacs scoil aitheanta.

An bhféadfadh Múinteoir Nua-cháilithe Droichead a dhéanamh má tá sé/sí fostaithe i scoil ospidéil?

Áirítear scoil ospidéil mar chomhthéacs oideachais speisialta agus ar an ábhar sin d’fhéadfadh Droichead a bheith ar siúl sa chomhthéacs sin, a fhad is go sásaítear na critéir cháilitheachta ar fad.

Is múinteoir bunscoile mé. Cén íosmhéid ama a mhaireann an próiseas Droichead?

Caithfidh múinteoir bunscoile íosbhloc 60 lá as a chéile a chur i gcrích i gcomhthéacs incháilithe ón dáta a céadcheapadh é/í i bpost a aithnítear chun críche Droichead i mbunscoil.

Is fiú a nótáil nach bhfuil ansin ach fíor-íostréimhse cleachtaidh; agus is dóigh leis an gComhairle, más rud é go dtéann do thréimhse cleachtaidh i scoil thar an tairseach sin, gurbh fhiú críochnú an phróisis a chur siar, go dtí níos gaire do dheireadh do thréimhse sa scoil. 

Is múinteoir iar-bhunscoile mé. Cén íosmhéid ama a mhaireann an próiseas Droichead?

Caithfidh múinteoir iar-bhunscoile íosmhéid 200 uair an chloig d’fhostaíocht múinteoireachta a chur i gcrích i gcomhthéacs incháilithe, ón dáta a céadcheapadh é/í i bpost a aithnítear chun críche Droichead in iar-bhunscoil.

Is fiú a nótáil nach bhfuil ansin ach fíor-íostréimhse cleachtaidh; agus is dóigh leis an gComhairle, más rud é go dtéann do thréimhse cleachtaidh i scoil thar an tairseach sin, gurbh fhiú críochnú an phróisis a chur siar, go dtí níos gaire do dheireadh do thréimhse sa scoil.

An áirítear, chun críche Droichead, uaireanta an chloig a chaitear ag múineadh ceann amháin nó níos mó de na cúrsaí gearra don Teastas Sóisearach?

Áirítear.

Tá déchlárú ag múinteoir, é/í cláraithe faoi dhó, i mbunscoil agus in iar-bhunscoil. Má chríochnaíonn sé/sí an próiseas Droichead i scoil amháin díobh, an leor sin don dá chás?

Ach Droichead a bheith déanta in earnáil amháin ní gá é a dhéanamh arís sa dara hearnáil chun críche clárúcháin. Gach seans gurb fhiú do mhúinteoirí atá ag aistriú as earnáil amháin agus isteach in earnáil eile tabhairt faoin eispéireas foghlama Droichead arís sa dara hearnáil, ach ní riachtanas de chuid na Comhairle é.

Cén chaoi a gcuirfidh mé isteach air?

Chun tosú ar Droichead, cuireann tú iarratas leictreonach chuig an gComhairle Mhúinteoireachta anseo. Eiseofar deimhniú ríomhphoist chugat ón gComhairle Mhúinteoireachta ag deimhniú go bhfuil tú tar éis clárú don phróiseas Droichead.

Cén uair ba cheart dom iarratas a chur chuig an gComhairle Mhúinteoireachta chun tús a chur leis an bpróiseas Droichead?

Ba cheart duit iarratas a chur chuig an gComhairle Mhúinteoireachta laistigh de chúig lá oibre i ndiaidh duit tosú i bhfostaíocht i scoil Droichead:

  • i socrú incháilithe agus
  • i bpost incháilithe a mhaireann 60 lá scoile as a chéile, ar a laghad (i gcás bunscoile), nó ina bhfuil bloc 200 uair an chloig (i gcás iar-bhunscoile).

An bhfuil spriocdháta ann don chlárú chun tús a chur leis an bpróiseas Droichead?

Beidh spriocdháta ann do na hiarratais a bheith faighte.  Postálfar réamhfhógra faoin spriocdháta ar shuíomh gréasáin na Comhairle Múinteoireachta sa dara leath den scoilbhliain. 

Tá obair ghearrthéarma agam mar mhúinteoir ionaid, ach níl mé cinnte cé chomh fada is a mhairfidh sí. Ar cheart dom iarratas a chur chuig an gComhairle Mhúinteoireachta chun tús a chur leis an bpróiseas Droichead?

Ná déan. Ní ceart iarratas a chur chuig an gComhairle Mhúinteoireachta chun tús a chur leis an bpróiseas  Droichead ach amháin

(1) má tá tú fostaithe i scoil  Droichead  agus

(2) má tá tú i gcomhthéacs incháilithe agus

(3) más post é le híosmhéid 60 lá scoile as a chéile (ag leibhéal na bunscoile), nó le bloc 200 uair an chloig (ag leibhéal na hiar-bhunscoile).

Céard a tharlaíonn má aistrím ón scoil ar chúis ar bith sula mbeidh an próiseas Droichead curtha i gcrích agam?

 Má aistríonn tú ón scoil sula mbeidh an próiseas curtha i gcrích beidh ort dul i dteagmháil leis an gComhairle Mhúinteoireachta ag conditions@teachingcouncil.ie agus d’Iarratas Droichead a chealú, mar beidh ort an próiseas Droichead a thosú arís.  Tabharfaidh sé sin deis duit athchlárú agus tosú ar an bpróiseas Droichead, nuair a thosaíonn tú i bpost múinteoireachta a cháilíonn, i scoil Droichead.

Bhí cuid den chlár ceardlainne ionduchtúcháin curtha i gcrích agam roimh Mheán Fómhair 2016. Céard a tharlóidh má thosaím Droichead?

Tá lánchead agat leanúint den chlár ceardlainne, agus dar le go leor de na múinteoirí nua-cháilithe gur fiú é. Ach ní riachtanas de chuid na Comhairle é dóibh siúd a chuir tús le Droichead le linn nó i ndiaidh na scoilbhliana 2016/2017.

Deirtear i mbeartas Droichead go mbíonn múinteoirí nua-cháilithe páirteach i gcnuaschruinniú amháin sa téarma. Má tá mé fostaithe sa scoil ar feadh bliana, agus má chríochnaíonn mo phróiseas Droichead i ndeireadh théarma 2, ar chóir dom freastal ar an gcnuaschruinniú i dtéarma 3?

Is próiseas Ionduchtúcháin é Droichead do mhúinteoirí nua-cháilithe (MNC - NQT) faoi cheannas comhghleacaithe níos oilte ar an bhFoireann Tacaíochta Gairmiúla (FTG - PST). Baineann gach gné den phróiseas le fáiltiú roimh na múinteoirí nua-cháilithe agus tacú leo i gcaitheamh a gcéad bhliana, agus iad ag dul i mbun freagracht iomlán a ghlacadh as eispéiris foghlama na mac léinn agus na ndaltaí. Is é ár dtaithí go dtí seo, go dtugann na cnuaschruinnithe deiseanna fiúntacha do mhúinteoirí nua-cháilithe foghlaim óna bpiaraí faoina gcuid taithí i scoileanna eile, agus comhairle agus tacaíocht a thabhairt dá chéile, agus an méid sin á éascú ag an gClar Náisiúnta Ionduchtúcháin do Mhúinteoirí. Sin an fáth a bhfuil siad ina gcuid chomh lárnach sin de phróiseas ionduchtúcháin Droichead.

Dá réir sin, a luaithe a sheoltar an Fhoirm D ar aghaidh go dtí an Chomhairle Mhúinteoireachta, ní riachtanas é feasta do mhúinteoirí nua-cháilithe freastal ar chnuaschruinnithe. Sin ráite, agus bunaithe ar an aiseolas ó mhúinteoirí nua-cháilithe ina dtaobh, molaimid go láidir do mhúinteoirí freastal ar aon chnuaschruinnithe atá ar siúl idir an pointe ama sin agus deireadh na scoilbhliana. Bíonn neart le tairiscint ag múinteoirí nua-cháilithe a bhfuil an próiseas Droichead curtha i gcrích acu dá gcomh-mhúinteoirí nua-cháilithe atá ag tosú ar an bpróiseas, agus má bhíonn siad rannpháirteach i gcnuaschruinnithe breise d’fhéadfaí deis foghlama fiúntach a chruthú dá bhfuil i láthair.  Go deimhin, d’fhéadfadh múinteoirí nua-cháilithe a bhfuil clárú iomlán faighte acu breathnú ar a rannpháirtíocht sna cnuaschruinnithe ina dhiaidh sin mar chuid dá n-aistear foghlama, agus iad ag bogadh go réidh ó Droichead i dtreo Cosán. D’fhéadfaidís a bheith ina gcuid den phróiseas forbartha Cosán sa tslí sin agus cuidiú le múnlú an chreata a fhorbairt tuilleadh, agus aitheantas a fháil dá réir as a bheith ag tacú le foghlaim na múinteoirí eile.

An bhféadfainn Droichead a dhéanamh má cháiligh mé mar mhúinteoir lasmuigh d’Éirinn, agus an choinníoll Cáilíocht Easnamhach ar mo chlárú?

Is féidir. Is creat ionduchtúcháin gairmiúil é Droichead. Ceadaítear do mhúinteoirí  Droichead a chur i gcrích a luaithe a théann siad i mbun fostaíochta, agus a gcuid easnamh ó thaobh cáilíochtaí de a réiteach san am ceánna, nó ina dhiaidh.  Maidir leis na múinteoirí ar fad a bhfuil clárú coinníollach acu, bíonn trí bliana acu de ghnáth chun na coinníollacha atá ag gabháil lena gclárúchán a réiteach.

Rinne mé Ceardlann Ionduchtúcháin cheana, an mbeinn in ann í a chur ar m’Fhoirm D mar Ghníomhaíocht Foghlama Gairmiúla?

Is féidir glacadh leis an gceardlann ionduchtúcháin mar Ghníomhaíocht Foghlama Gairmiúla a fhad is go luíonn sí i dtréimhse ama do phróisis Droichead, agus gur aontaíodh le d’Fhoireann Tacaíochta Gairmiúla (FTG/PST) go bhfeileann sí do do chuid riachtanas.  Má rinne tú an cheardlann sular cláraíodh don phróiseas Droichead thú, ní áireofar gurb í an Ghníomhaíocht Foghlama Gairmiúla í.

Sular thosaigh mé Droichead bhí na 10 gCeardlann Ionduchtúcháin ar fad déanta agam. An mbeinn in ann iad a chur ar m’Fhoirm D mar Ghníomhaíocht Foghlama Gairmiúla?

Bheifeá, de réir na Socruithe Eatramhacha i gcás Droichead, féadfaidh tú na 10 gceardlann ionduchtúcháin a chur síos mar chúiteamh ar an riachtanas Gníomhaíocht Foghlama Gairmiúla a bheith déanta.

Cén difríocht atá idir an Clár Ceardlann Ionduchtúcháin agus Cnuaschruinniú?

Sraith 10 gcruinniú dhá uair an chloig atá sa Chlár Cheardlann Ionduchtúcháin, cuid den “phróiseas ionduchtúcháin traidisiúnta”, i.e. Promhadh &  Ceardlanna Ionduchtúcháin do mhúinteoirí bunscoile agus Fostaíocht Iar-Cháilíochta  & Ceardlanna Ionduchtúcháin do mhúinteoirí iar-bhunscoile. Bíonn na ceardlanna ar siúl sna hionaid oideachais áitiúla, agus cuid díobh ar fáil ar líne. Ón mbliain acadúil 2016/2017 ar aghaidh, ní gá do mhúinteoirí a théann go hiomlán leis an bpróiseas Droichead an Clár Ceardlann Ionduchtúcháin a dhéanamh, ós rud é go gcomhlíontar coinníoll an ionduchtúcháin mar chuid den phróiseas comhtháite Droichead. Baintear an coinníoll faoin gCeardlann Ionduchtúcháin nuair a sheoltar an Fhoirm D Droichead agus í comhlánaithe.

Tá Cnuaschruinnithe ina gcuid de na gníomhaíochtaí foghlama gairmiúla breise a theastaíonn mar chuid de Droichead, an próiseas ionduchtúcháin nua do mhúinteoirí. An Clár Ionduchtúcháin Náisiúnta do Mhúinteoirí (CINM/NIPT) a dhéanann iad a éascú in Ionaid Oideachais áitiúla. Caithfidh Múinteoirí Nua-Cháilithe freastal ar chnuaschruinniú (2 uair an chloig) amháin sa téarma mar chuid dá bpróiseas Droichead. Bíonn an sceideal náisiúnta cnuaschruinnithe ar siúl i gcaitheamh na scoilbhliana. Fógraítear dátaí, ionaid agus amanna cnuaschruinnithe ar shuíomhanna gréasáin na n-ionad oideachais.

Céard a dhéanfaidh mé má chuirim isteach ar Droichead ach má shocraím ar ball gan dul leis an bpróiseas?

Beidh ort ríomhphost a sheoladh chuig an gComhairle,  chuig conditions@teachingcouncil.ie  á rá go dteastaíonn uait d’iarratas ar Droichead a chealú, agus an chúis le do chinneadh a thabhairt.  Ligfidh sé sin duit iarratas nua a dhéanamh amach anseo, más mian leat.

Céard a tharlaíonn nuair a sheolaim an Fhoirm D ar aghaidh?

Más múinteoir bunscoile thú agus má sheolann tú an Fhoirm D ar aghaidh, baintear na coinníollacha maidir le Droichead/Promhadh agus Ionduchtú (más cuí).

Más múinteoir iar-bhunscoile thú agus má sheolann tú an Fhoirm D ar aghaidh, baintear na coinníollacha maidir le Droichead, Fostaíocht Iar-cháiliúcháin (FIC - PQE) agus Ionduchtú (más cuí).

Céard a chaithfidh mé a dhéanamh agus Droichead curtha i gcrích agam?

Nuair a bheidh an próiseas Droichead curtha i gcrích agat, déanann an Fhoireann Tacaíochta Gairmiúla agus an Múinteoir Nua-cháilithe an Fhoirm D a chomhlanú. Is féidir an Fhoirm D a íoslódáil ó shuíomh gréasáin na Comhairle Múinteoireachta anseo. Ní mór an fhoirm sin, mar aon leis an admháil ríomhphoist, a sheoladh go dtí an Chomhairle Mhúinteoireachta.

An gá dom aon rud a chur in éineacht le Foirm D – Droichead, atá comhlánaithe agam?

Má chláraigh tú le haghaidh Droichead roimh mhí Mheán Fómhair 2017 déan cinnte de go gcuireann tú cóip atá priontáilte amach den deimhniú ríomhphoist a fuair tú ó Ionad Oideachais Luimnigh ina ndeimhnítear gur chláraigh tú le haghaidh Droichead trí úsáid a bhaint as an DRI.

Má chláraigh tú le Droichead i ndiaidh mhí Mheán Fómhair 2017, áfach, déan cinnte de go gcuireann tú cóip atá priontáilte amach den deimhniú ríomhphoist a fuair tú ón gComhairle Mhúinteoireachta ina ndeimhnítear go bhfuil tú cláraithe le haghaidh Droichead.