Ghrinnfhiosrú

Ceanglaítear ar an gComhairle Mhúinteoireachta, mar eagraíocht sceidealta, de réir Alt 18 den Acht um an mBiúró Náisiúnta Grinnfhiosrúcháin (Leanaí agus Daoine Soghonta), 2012 go 2016, faisnéis shonraithe a fhógairt don Bhiúró Náisiúnta Grinnfhiosrúcháin más rud é, tar éis imscrúdú, fiosrú nó próiseas rialála, go bhfuil imní bona fide ar an gComhairle Mhúinteoireachta go bhféadfadh an duine is ábhar don imscrúdú, don fhiosrú nó don phróiseas rialála sin—

(a) díobháil a dhéanamh d’aon leanbh nó d’aon duine soghonta,

(b) a chur faoi deara díobháil a dhéanamh d’aon leanbh nó d’aon duine soghonta,

(c) aon leanbh nó aon duine soghonta a chur i mbaol díobhála

(d) féachaint le díobháil a dhéanamh d’aon leanbh nó d’aon duine soghonta, nó

(e) duine eile a ghríosú chun díobháil a dhéanamh d’aon leanbh nó d’aon duine soghonta,

Cuirfidh an Chomhairle Mhúinteoireachta in iúl don duine sin go bhfuil imní bona fide uirthi agus go bhfuil sé ar intinn aici é a fhógairt don Bhiúró.

Féach Achtanna um an mBiúró Náisiúnta Grinnfhiosrúcháin (Leanaí agus Daoine Soghonta), 2012 go 2016 le do thoil, le haghaidh tuilleadh eolais faoi Alt 19 den Acht.”

Eiseoidh an Chomhairle Mhúinteoireachta do nochtadh grinnfhiosrúcháin (toradh an ghrinnfhiosrúcháin) trí thairseach shlán, ar líne, ar a dtugtar Digitary. Réiteach gréasánbhunaithe é Digitary a chuireann ar chumas institiúidí doiciméid oifigiúla a eisiúint go slán sábháilte ar líne.

Féadfaidh múinteoirí rochtain a fháil ar thoradh a ngrinnfhiosrúcháin tríd an tairseach ghréasáin shlán. Féadfaidh siad toradh an ghrinnfhiosrúcháin a chomhroinnt ar líne, ar bhealach rialaithe iniúchta, le tríú páirtithe ina dhiaidh sin, lena n-áirítear scoil/fostóirí. Féadfaidh tríú páirtithe (e.g., fostóir), doiciméid chomhroinnte a fhíordheimhniú le cead úinéir an doiciméid, i.e., an múinteoir.

Réiteach doiciméid leictreonaigh atá inbhreisithe, idir-inoibrithe agus fíorshlán é an réiteach ar líne. Úsáideann sé Ríomhshínithe Ardleibhéil XML (XML Advanced Electronic Signatures - XAdES) agus ceadchomharthaí cripteagrafacha deimhnithe leibhéal 3 FIPS 140-3 (FIPS 140-3 level 3 certified cryptographic tokens) chun Ríomhshínithe Cáilithe a tháirgeadh de réir Threoir an AE le haghaidh Ríomhshínithe, 1999/93/CE.

Gheofar breis eolais faoin réiteach ar líne anseo.

Tá sé riachtanach duit dul faoi ghrinnfhiosrúchán i láthair na huaire sna cúinsí seo a leanas: -

• don chlárú tosaigh, tá sé riachtanach do gach iarratasóir clárúcháin dul faoi ghrinnfhiosrú.
• don athnuachan clárúcháin (más rud é gur eisíodh fógra grinnfhiosrúcháin chugat).

Maidir le múinteoir cláraithe nach bhfuil in ann fógra ath-ghrinnfhiosrúcháin a chomhlíonadh nó a dhiúltaíonn é a dhéanamh, tabharfar deis dó/di aighneacht a chur faoi bhráid na Comhairle agus na cúiseanna a thabhairt nár chomhlíon sé/sí an iarraidh. Beidh air/uirthi fianaise a chur ar fáil freisin gur duine cuí oiriúnach é/í lena c(h)oinneáil ar an gclár. Nuair a dhéanfar a (h)aighneacht a bhreithniú, féadfaidh an Painéal Fianaise ar Charachtar sa Chomhairle athnuachan clárúcháin a cheadú agus coinníoll ag gabháil leis nó gan coinníoll ag gabháil leis, nó d’fhéadfadh an Painéal diúltú clárú an mhúinteora a athnuachan.

Níl aon táille ar ghrinnfhiosrúchán.

Más rud é go bhfuil iarratas ar nochtadh grinnfhiosrúcháin á chur faoi bhráid an Bhiúró agat, ceanglaítear ort sonraí gach ciontaithe a thabhairt mar chuid den iarratas, seachas ciontuithe lena mbaineann alt 14A d’Achtanna an Bhiúró Náisiúnta Grinnfhiosrúcháin. Gheofar breis eolais anseo. Mura bhfuil tú cinnte de do stádas maidir le cion ar leith lorg an chomhairle dlí chuí, le do thoil.